暑期親子活動推介

3 months ago 編輯 Comments Off on 暑期親子活動推介

暑假就快開始啦,仲未安排好節目?
未都唔緊要,全民媒體同你推介今個暑假四個親子節目,等小朋友可以喺玩嘅同時都學到野。

 

益智指數(*****為最高)

 

第一個:大熊貓館

呢個大熊貓館並唔係海洋公園入面嗰個大熊貓館,而喺海洋公園為咗響應每年八月嘅大熊貓慶生活動,喺D2 PLACE二期商場開設數碼大熊貓館作為「香港掂檔」其中一個節目,係海洋公園於園外設置嘅展館,令大家可以更了解大熊貓嘅習性同保育資料。

場館裡面會佈置成竹林,並設有資料區、展覽區、遊戲及自拍區。館內設有闊12米高3米的巨型屏幕,無間斷咁播海洋公園嘅大熊貓片段。大家仲可以喺自拍區同1:1熊貓公仔影相,而小朋友就可以一邊學野,一邊參加遊戲贏紀念品,啱哂一家大細。

益智指數:***

活動日期:2017年7月15日至8月31日
時間:中午12時至晚上9時
地點:D2 Place 二期地下 The Garage *免費入場
入場費:免費入場

 

第二個:「玩轉機械智激FUN」

新成立嘅挪亞學堂推出咗連串體驗活動,包括全新嘅機械體驗同埋親子競技遊戲。
挪亞學堂喺一個為3至12歲小朋友而設嘅會籍計劃。計劃透過全新學習體驗,鼓勵同幫助小朋友建立良好品格同學習生活技能,實現全人發展嘅目標。
挪亞學堂設計咗一個以STEAM(即Science科學、Technology 科技、Engineering工程、Art藝術 、Math數學)做主題嘅活動,以遊戲方式學習,培養小朋友佢哋敢於嘗試嘅精神。

透過十個新穎同創意十足嘅競技遊戲,過程中父母需要同小朋友緊密合作,培養小朋友嘅團隊精神,順便增進埋親子間嘅關係。
除咗學到新嘅知識外,呢個活動仲可以提升小朋友嘅腦部認知能力及身體肌肉。

益智指數:*****

活動日期:2017年7月21日至 8月27日(逢星期五、六及日)
時間: 上午10時至下午6時
地點: 香港新界馬灣珀欣路33號
入場費: 凡進入挪亞方舟人士需繳付入場費,成人HK$168;小童及長者HK$138

 

第三個:天際時光機

sky100喺呢個暑假集合過去十幾年具香港特色嘅場景,將港人舊時生活重現眼前。
一系列精選懷舊佈置包括:唐樓商店街﹑巨型康樂棋﹑紅Van﹑叁玖叁士多等。

喺活動推廣期間,拎住小朋友門票到sky100,就可以免費拎到「天際兒童樂園」創意書仔一本,書入面有更多懷舊嘅玩意。
「天際兒童樂園」裡面有多個具備香港特色嘅益智遊戲,如:圖畫練習、「天下太平」和畫謎等。爸爸媽媽喺緬懷過去嘅時候,仲可以同時教導仔女香港嘅舊時生活。

7月29日及8月19日去到sky100參加工作坊,即場仲會教你整小巴水牌。參加者除咗可以喺水牌上寫香港各區嘅名,仲可以寫自己想去嘅地方,擁有一個專屬於你嘅小巴水牌!
喺活動推廣期間嘅星期六及日,由上晝11點到夜晚7點,小朋友可以將親手畫嘅香港天際線或者影低左嘅懷舊場景相印喺T恤上,可以好好紀念呢個節目!

益智指數:****

活動日期 : 2017年7月22日 (星期六) 至9月3日 (星期日)
地址: 西九龍柯士甸道西1號環球貿易廣場

門票費用:
成人:港幣168
3 – 11歲小童:港幣118
長者:港幣118
(3歲以下兒童免費)

 

最後一個:香港書展

今年書展嚟到第28屆啦,由今日起至到下個星期二(7月25日),喺灣仔香港會議展覽中心舉行。

今年書展集合咗37個國家及地區、為大家帶嚟各式各樣精彩書籍。喺呢七日展期裡面,大會喺會展場內舉辦超過320場文化活動,為讀者提供唔同嘅選擇,提升大家嘅文化修養。
當中講座會有「兒童及青年閱讀系列」,家長可以帶小朋友嚟聽下,培養下小朋友嘅讀書興趣。

同時第一屆香港運動消閒博覽會喺7月21日至25日喺灣仔會展中心舉行,拎住當日有效嘅書展門票,就可以去埋香港運動消閒博覽,咁就又可以過咗一個有意義嘅一日啦!

益智指數:****

活動日期:2017年7月19日至25日
地點:香港灣仔博覽道一號香港會議展覽中心

時間:
7月19、20、23及24日 – 上午10時至晚上10時
7月21及22日 -上午10時至午夜12時(展覽廳3開放至晚上11時)
7月25日 – 上午9時至下午5時

入場費:
成人票:港幤$25
小童票:港幤$10 (適用於小學生/身高1.22米或以下的兒童)
3 歲或以下小童及 65 歲或以上長者免費進場

 

活動詳情可以留意返以下連結:

大熊貓館

「玩轉機械智激FUN」

天際時光機

香港書展