如果食煙唔臭,條數又點計

3 months ago 的士陳 Comments Off on 如果食煙唔臭,條數又點計

網民指小弟上一篇文章《寶寶抽煙,但寶寶不說》所提及的電子煙並不合法。網民鬧得我好啱,我真係唔值得原諒,明明我對煙同酒都好高要求,但我竟然無fact check iQOS喺香港同大陸嘅法例問題。衝出黎認叻,搞到俾人笑到面都黃。

眼見嘅嘢未必係合法,Uber係咁、Airbnb係咁。的確iQOS喺香港仲未有得賣,而作為新一代煙產品,煙草商無理由放棄任何一個市場。由此推論,IQOS同Airbnb等一樣,必然係受到香港現有法例考驗。立法會討論革新過時法例,促進創新科技發展動議,原意係為共享經濟拆牆鬆綁。如果你換返支wide鏡睇清楚,過時法例所限制嘅,又豈止共享經濟,而是我哋選擇嘅自由。

關於香煙嘅討論,不應只是to be or not to be。十年間iPhone都出到iPhone 8,香煙面世幾百年,漸漸已經有更好嘅選擇,對自己、對身邊人影響更少。而喺現今社會風氣下,政府就係將吸煙妖魔化嘅推手,煙民只可以選擇戒煙。我明白吸煙嘅自由同呼吸清新空氣嘅權利係有產生衝突,但如果食煙係唔臭,咁條數又點計?政府立法保障市民應有權利係無可厚非,但唔應該無止境利用剛性家長主義,扼殺煙民選擇嘅權利。新政府上場,食物及衛生局由一向仇煙嘅陳肇始坐正,煙民應該唔洗旨意有運行。

自從蘋果日報28號出咗隻故講水貨店違法銷售加熱煙,之後煙彈就從網上市場絕跡。煙同酒係好貴,但就算我有個肯請我食iQOS嘅女朋友,而家佢都買唔到了。

 

上一篇文章傳送門:https://hkcitizensmedia.com/2017/06/27/%E5%AF%B6%E5%AF%B6%E6%8A%BD%E6%B0%B4%EF%BC%8C%E4%BD%86%E5%AF%B6%E5%AF%B6%E4%B8%8D%E8%AA%AA/